Подземная мечеть Масат-ата 

Қорымның оңтүстік-батыс бөлігінде Масат ата жерасты мешіті орналасқан. Мешіт басқа ескерткіштерге қарағанда жақсы сақталған және қолайсыз табиғи әсер жоқ.

Тығыз құмтастан ойылып, ішкі интерьері төрт қанатты киіз үй түрінде жасалған. Жоғарғы жағындағы дөңгелек ойықтан ішке жарық түседі.

Оның сыртқы беті өңделген тастармен көмкерілген. А.Н. Бернштамның «Қырғызстанның сәулет ескерткіштері» атты еңбегінде мұндай күмбезді құрылыстар салу Азия даласын мекендеген атты көшпелілерге тән қасиет болған деп болжайды. Бұл қазақ киіз үйлеріндегі шаңырақтың көшірмесі сияқты.

Мешіттің оңтүстік бөлігінде ішке кіруге арналған есік орнатылған. Ішкі бетінде Мекке бағытында михраб ойылған. Есіктің оңтүстік бетінде михраб бар, қабырғаларға сүрелер жағылған және кіреберісте Меккеге қарай шағын дәліз бар. Төбедегі тесік таспен нығайтылған. Сыртқы жағында 3-4 м батысқа таман диаметрі 2,5 м болатын қазылған шұңқыр орны сақталған. Мешіттің алдында бірнеше метрлік науасы бар жалпақ тас орналасқан. Бұл науа қазылған құдықпен түйіседі.

Ескерткіш алғаш рет 1979 ж. ҚазКСР Мәдениет министрлігі экспедициясымен сәулетші М. Нұрқабаевтың жетекшілік етуімен зерттелген. Ескерткіш алғаш рет мемлекеттік қорғауға Қазақ ССР Министрлер кеңесінің 1982 жылғы 26 қаңтардағы № 38 қаулысымен алынған.

Қазіргі таңда Қазақстан Республикасы Мәдениет және спорт министрінің 2015 ж. 30 наурыздағы №119 бұйрығымен Республикалық маңызы бар тарих және мәдениет ескерткіштерінің мемлекеттік тізіміне енгізілген.

Масат ата қорымындағы объектілерге 2005, 2006 жылдары «Маңғыстауреставрация» АҒЖӨШ мамандарымен ғылыми-қалпына келтіру жұмыстары жүргізілді.