Ержан Хазірет Кесенесі
Маңғыстау облысы әкімдігінің 2018 жылғы 5 қаңтардағы №3 қаулысымен Жергілікті маңызы бар тарих және мәдениет ескерткіштерінің мемлекеттік тізіміне енгізілген.
Аса көрнекті дінбасы Ермұһаммед Төлегенұлы, халыққа танымал есімі – Бектеміс Ержан Хазірет, 1887 жылы қазіргі Маңғыстау облысының Керел жерінде дүниеге келген.
Бастапқы білімді жергілікті мектептен алады, кейін Бұқара қаласындағы «Көкілташ» медресесіне түсіп, оны 1926 жылы ұстаздық мамандығы бойынша бітіреді. Осы жылдан бастап туған өлкеде ағартушылықпен айналысады.
Кеңес үкіметі тарапынан үнемі қуғын көреді, 1932, 1936, 1937 және 1941 жылдары тұрғындар арасында Кеңес үкіметіне қарсы насихат жүргізгені, дін таратумен айналысқаны үшін 4 рет сотталады. Соңғы соттың үкімімен еңбекпен түзеу колониясына он жылға жіберіледі, рақымшылықпен босатылды. Өмірінің соңына дейін арнаулы ұйымдардың астыртын және жартылай жария қадағалауында болады.
